Kufuatia
kuwepo kwa tetesi kuwa baadhi ya Wanachama wa Chama Cha Mapinduzi wa CCM watakihama chama mara baada ya
kushindwa kura za maoni,mwenyekiti wa CCM mkoa wa Shinyanga,Khamis
Mgeja,amewaondoa hofu wanachama wa chama hicho
na wananchi kuwa hakuna atayehama na kwamba watabanana hapo hapo.
Mgeja
alitoa kauli hiyo katika Kijiji cha Kangeme Kata ya Ulowa wilayani Kahama
wakati wa sherehe za ushindi wa serikali za mitaa na vitongoji ambapo CCM
ilishinda kwa asilimia mia moja katika Kata hiyo.
Mgeja
aliwataka kuzipuuza taarifa zinazoenea kuwa miongoni mwao watahama CCM huku
akiwaomba kutokuwa na mashaka ya kutokea mpasuko ndani ya chama katika uchaguzi
mkuu wa mwaka huu.
Mwenyekiti
huyo alisema ingawa kuna baadhi ya viongozi ndani ya Chama kupitia mitandao ya
kijamii na vyombo vya habari wamediriki kudai kuna baadhi ya wanaonyesha nia
katika nafasi mbalimbali za uchaguzi kupitia CCM, kuwa watajiengua pindi watakaposhindwa
kura za maoni,alidai maelezo hayo siyo ya kweli bali yana nia ya kuwaogopesha
wana chama na Watanzania kwa ujumla.
“Ndugu
zangu ndani ya CCM kuna wanachama wakomavu,na waliowekeza jasho lao jingi kwa
muda mrefu ndani ya chama,hawa wanajua kushinda na kushindwa na hasa kwa kuwa
chaguzi za ndani ya chama huwa tunapangana,hatushindani,ndiyo maana mwaka
1995,Rais Kikwete alikubali matokeo na leo ndiyo Rais wetu,huyu ni kiongozi
mkomavu na mvumilivu anayestahili kuigwa ndani ya chama,hivyo hakuna atakayehama
tutabanana mpaka kieleweke dakika 90”,alisema Mgeja.
Aliwaomba
wanachama wa CCM kuendelea kuwa na imani na chama chao hasa kwa kuwa haki
itatendeka,kwa kila mwanachama atakayegombea nafasi ya udiwani,ubunge na urais
katika uchaguzi mkuu ujao.
Mgeja
alisema kuna baadhi ya viongozi na genge
la watu wachache wamekuwa wakisambaza maneno ya kuwatia hofu wanachama na
watanzania kuwa kuna baadhi ya wagombea watakatwa majina yao.
Alisisitiza
kuwa Chama hakijawa na ajenda hiyo wala kuweka kwenye vikao,na kudai kuwa huo
ni mkakati mchafu wa baadhi ya wagombea na wapambe wao kutaka kuchafuana na
hasa wagombea wanakubalika kwa wananchi.
Aidha
alionya viongozi wa Chama kulazimisha kuwachagulia wagombea wananchi,jambo
ambalo limekuwa likiigharimu mara nyingi CCM kwa kushindwa katika baadhi ya
maeneo kwenye chaguzi zilizopita,hivyo kuwataka kukubali chaguo la wanachama
katika kumpata mgombea na sio viongozi.
“Tuache
kubeba wagombea na kuwachagulia wagombea wananchi,nawaomba wanachama na
viongozi tujifunze kama Kata ya Ulowa,kwa kuacha mapendekezo ya walio wengi
ndani ya Chama, kumesababisha kupata ushindi wa kishindo wa asilimia mia
moja”,alisema Mgeja.
Katika
sherehe hizo zilizoambatana na muendelezo wa hafla ya kumbukumbu ya kuzaliwa
kwa chama hicho kutimiza miaka 38,Mgeja aliwasihi na kuwaomba wanachama na
viongozi wakati wakitimiza miaka hiyo, watambue kuwa CCM imefanya mengi ya
maendeleo kwa watanzania hivyo kutumia fursa kuyatangaza kuliko kupoteza muda
mwingi kutengeneza mikakati mingi ya kumalizana na kuhujumiana.
Sherehe
hizo pia zilikuwa ni za kupongezana kutokana na ushindi waliopata katika
chaguzi za mitaa na vitongoji,ambapo Kata hiyo ilishinda vijiji sita vya
Kangeme,Ulowa,Ngilimba,Ilomelo,Bugela na Ulowa namba nne na vitongoji 38 na
wajumbe wote wa serikali za vijiji.
Na Kadama Malunde-Kahama